أهلآ وسهلآ ..
كثير مننا يعتبرو المناكير شي عادي لون والسلام فـ تشتري إي ماركه وبعدين تنصدم بخفة اللون أو أن المناكير نفسه يتقشر أو أو أو ..... وكثير يحتارون اي ماركة هي الأنسب لنا عشان كذا حبيت اتكلم عن هالشي
في تدوينة اليوم حتكلم فيها عن بعض ماركات المناكير اللي عندي , و عن مميزاتها وعيوبها
طبعا ما صورت كل الألوان اللي عندي لأني ابغى اركز في الماركة نفسها يعني ماراح اسوي سواتشز هنا
اذا حابين تشوفو السواتشز قولو لي و أنزلهم ع الانستقرام ( Glamour00 )
أول ماركة مناكير حتكلم عنها هي : H&M
زي ما أنتو شايفين بالصورة صورت لون ذهبي مايل للأصفر .
أوكي مميزاته ( بنظري ) :
١- ألوان هالماركة حلوه ودايما يجددون الألوان مرا فاقعه مرا غامقه وهكزا :DD
٢- شكل المناكير الخارجي جميل ( أحب المناكير اللي ع شكل مربع مدري شكلها ع التسريحه كيووت ) ممكن بعضكم مايعتبر الشكل شي مهم بس عن نفسي اهتم لهالشي .
٣- ينشف بسرعه , مو بسرعه خياليه بس احسن من غيره من ناحية انو ينشف بسرعه والا يتسهبل .
عيوب هالماركة :
١- خفيف يعني يحتاج طبقتين او ٣ عشان بعض الالوان توضح يعني عندي من هالماركة لون نيلي جميل بس مو من اول كوت يوضح لا احتاج كذا طبقة . بعكس اللون الذهبي اللي بالصورة يبان بسرعه .
يعني انصحكم بالالوان القويه لو انتو ماتحبو تحطو كذا طبقة اما الخفيفه ابعدي عنها أو الفسفوريه كمان .
٢- سعره . يعني هو سعره عادي ٢٩ او ٣٩ ماني فاكره بس فيه ماركات افضل بهالسعر عشان كذا اعتبر سعره من العيوب .
ثاني ماركة حبيبة الجميع ماركة : Essie
مميزاتها :
١- لونها غني جدا جدا يعني من اول طبقة يبان اللون .
٢- ألوانهم متعدده يعني تحتاري بالدرجات لو مثلا حابه تشتري لون بينك تشوفي مية درجة من هاللون فـ هالشي جدا حلو .
٣- فيها لمعة ساحره يعني ما تحتاجي تحطي توب كوت , يعني لو حابه المناكير يكون بلمعه لا تترددي بهالماركة
٤- سعرها ٤٠ ريال يعني بعد هالمميزات كلها يعتبر سعرها مناسب .
عيوبها :
١- العيب الوحيد اللي لاحظته بهالماركة أنه لو طولتي مثلا ٥ ايام وانتي حاطه هالمناكير راح تلاحظي انه يتقشر !
فهالشي ماحبيته لأنه وقت ( البيريود ) خلاص تحطي لون وماتبغي تغيريه فـ لو حطيتي من هالماركة راح تضطري تمسحيه بعد كم يوم وتحطي مرا ثانيه . لأن شكل المناكير وهوا متقشر أبدا مو حلو .
ثالث ماركة هي : claire's
مميزاتها : مافيش مميزات ابدا ابدا بالنسبة لي ! أحس هالماركة خاصة بالمراهقات و الأطفال .
عيوبها : طبعا انا جربت مناكير الجليتر و برضو الالوان العاديه .
١- خفيفه مممرآ + الجليتر خفيف كأنه مويآ !!
٢- سعرها الظاهر الحبه ب ١٢ فـ ما تستاهل ريالين ( :
ألوانهم هيا هيا ماتتغير .
ثالث ماركة هي : Revlon
مميزاتها :
١- ألوانها حلوهه و يجيبون ألوان غريبه شوي .
٢- اللون غني و فيه لمعه بس اخف من لمعة ماركة ايسي !
٣- ماتتقشر أبدا لو طولتي فيها يعني .
٤- سعرها ممتاز اظن ب ٣٠ او حولها
عيوبها :
ما شفت اي عيب عشان كذا هي ماركتي المفضلة :$
رابع ماركة هي :Nivea
يا قدمي هالماركة مدري هي موجودة للحين والا لآ !
عموما من زمان عندي هاللون ما أفتكر عيوبها او مميزاتها تمام بس أفتكر ان لونها جدا غني و بنفس الوقت ثقيل شوي !
خامس ماركة : Florelle
المميزات :
١- ألوانها جدا واضحه .
عيوبها :
١- ممكن بعد فترة المناكير يثقل ويخرب عليك .
ما أفتكر سعرها بالضبط بس فيه الأفضل فـ ما صرت اشتري منها أبدا .
آخر ماركة : Flormar
مميزاتها :
كلها مميزات صراحه وبمستوى رفلون بس تفوقت ع ماركة رفلون بالسعر لأنها ب ١٠ ريال فقط .
اللون العادي ب ١٠ ريال اما الانواع الثانيه مثلا المات ب أكثر ٢٠ اظن .
عيبها الوحيد أحس الالوان محدده مو كثيره .
بس خلصت بالنهاية بالنسبة لي الأفضل بالترتيب :
١- آيسي
٢- رفلون
٣- فلورمار
كمان شي ثاني ما فكرت اشتري مناكير من ماركات الهاي اند لأن أحس إذا توفر شي مشابه لمميزات الهاي اند
وبسعر أقل أكيد راح اتجه له ( :
و أنتو قولو لي ايش افضل ماركة مناكير مرتاحة لها ؟
وإذا حابين السواتشز اعطوني اخبر انزلهم بـ اكاونتي بالانستقرام :$
حابين تتواصلو معاي :
Twitter : @Glamourizz ❤
E-mail : Glamour--16@hotmail.com ❤
ask : ask.fm/Glamourizz ❤
instagram : GLAMOUR00 ❤
